काठमाडौं, १८ पुष : नेपालका लेग स्पिनर बलर सन्दीप लामिछानेले विग वास लिगको चौंथो तथा अन्तिम खेलमा पनि १ विकेट लिएका छन् ।
औसत बलिङ गरेका सन्दीपले ४ ओभरमा ३१ रन खर्चिदै मेलवर्न रेनेगेड्सका कप्तान टम कुपरको विकेट लिएका हुन् । खेल पनि सन्दीपकै टिम मेलवर्न स्टार्सले जित्यो । १ सय ४९ को लक्ष्य मेलवर्न स्टार्सले ३ विकेट गुमाउँदै १७.५ ओभरमा भेट्यायो ।
मेलवर्न स्टार्सका लागि मार्कस स्टोनिसले अविजित ७८ रनको पारी खेले । त्यस्तै कप्तान ग्लेन म्याक्सवेलले ३३ र वेन डंकले ३२ रन बनाए । मेलवर्न रेनेगेड्सका लागि क्यामेरन वोइसले २ विकेट लिएका थिए भने मेलवर्न स्टारका निक लार्किन रन आउट भएका थिए ।
यसअघि टस हारेर ब्याटिङको निम्तो पाएको रेनेगेड्सले २० ओभरमा ९ विकेट खर्चेर जम्मा १ सय ४८ को योगफल खडा गरेको थियो । उसका लागि साम हार्परले ३० रनको शानदार पारी बाहेक अरु खेलाडीले उत्कृष्ट प्रदर्शन गर्न सकेनन् ।
यसपछिका खेलमा भने सन्दीपलाई देख्न सकिने छैन । सन्दीप बंगलादेशको प्रिमियर लिग (बीपीएल) खेल्न बंगलादेश जानेछन् । उनी सिल्लेट सिक्सर्सबाट खेल्दै छन् । विग वास अघि नै बीपीएल मा अनुबन्धन भएको हुँदा सन्दीपले अष्ट्रेलिया छोडेका हुन् । कूल ४ खेल खेलेका सन्दीपले विग वास लिगमा ८ विकेट लिएका छन् ।
