काठमाडौं । अमेरिकी राष्ट्रपति निर्वाचनको मत परिणाम सार्वजनिक हुन केही विलम्ब भइरहेका बेला यसका दुई प्रत्यासी डोनाल्ड ट्रम्प र जो बाइडनले आ–आफ्नो धारणा सार्वजनिक गरेका छन् ।
ट्रम्पले हुलाकमार्फत गरिएका मतदानको वैधतामाथि प्रश्न उठाउँदै वैध मतपत्र गणना गरे आफूले सहजै जित हात पार्ने दाबी गरेका छन् ।
ट्रम्पले आफ्नो धारणा सार्वजनिक गर्दै भनेका छन्, ‘वैध मतपत्र मात्रै गणना गर्ने हो भने मेरो जित सहज छ ।’
निर्वाचन सकिएलगत्तै हुलाकमार्फत गरिएका मतदानबारे कुनै टिप्पणी नगरेका ट्रम्पले परिणाम आफ्नो पक्षमा नपर्ने स्पष्ट संकेत देखापर्न थालेपछि यसको वैधतामाथि प्रश्न उठाएका छन् । मतगणना स्थगितको माग गर्दै उनी अदालतसम्म पुगेका छन् । यद्यपि, उनले निर्वाचनमा भएको धाँधलीबारे अहिलेसम्म कुनै ठोस प्रमाण पेस गर्न भने सकेका छैनन् ।
उता, जित नजिक रहेका बाइडनले आफू निर्वाचित हुनेमा विश्वस्त रहेको बताएका छन् । उनले संयमित हुन सबै देशबासीलाई आग्रह पनि गरेका छन् ।
लोकतन्त्रमा कहिलेकाहीँ समस्या आए पनि प्रक्रियाले काम गरिरहने भएकाले निराश हुन नपर्ने उनको भनाइ छ ।
