काठमाडौं, चैत्र ४ \\ “प्रधानन्यायाधीश गोपाल पराजुलीले अदालतको मानहानि हुने काम गरे” भनि गोपाल पराजुली प्रधानन्यायाधीशमा बहाल रहँदै सर्वोच्च अदालतमा परेको अदालतको अवहेलना मुद्दा दर्ता गर्ने वा नगर्ने ? आज आइतबार निर्णय हुनेभएको छ।
मनोज अधिकारीले दर्ता गराएको उक्त अवहेलना निवेदन आजको कजलिष्टअनुसार कामु प्रधानन्यायाधीश दीपकराज जोशीको इजलाशमा परेको छ।
यसअघि गोपाल पराजुली प्रधानन्यायाधीश हुँदा उक्त निवेदन “प्रधानन्यायाधीश विरुद्ध अवहेलना-निवेदन दर्ता गर्न नमिल्ने” भन्दै तल प्रशासनले नै दरपिठ गरेको थियो। सर्वोच्च अदालतको प्रशासनले गरेको दरपिठविरुद्ध मनोज अधिकारीले इजलाशमा निवेदन दिएका थिए। उक्त निवेदनमाथि आज सुनुवाई हुनेभएको हो।
त्यही पुरानो निवेदनमाथि सुनुवाई गर्दै पूर्वप्रधानन्यायाधीश पराजुलीविरुद्ध अवहेलना मुद्दा दर्ता हुने कि नहुने निर्णय गरिनेछ।
