काठमाडौं । माओवादी केन्द्रका उपमहासचिव जनार्दन शर्मामाथि एउटा आरोप लागिरहन्छ-नेत्रविक्रम चन्द विप्लवलाई रोकेको भनेर, माओवादी केन्द्रका अध्यक्ष पुुष्पकमल दाहाल प्रचण्डसहित धेरै नेताले पछिल्ला दिनमा लगाउने आरोप हो ।
विप्लवलाई प्रचण्डले महासचिव बनाउन चाहन्थे तर शर्मा र वर्षमान पुन मिलेर रोकेको भन्ने माओवादीभित्र चर्चा भइरहन्छन् । हुन पनि विप्लवलाई महासचिव बनाउने गरी प्रचण्ड र उपाध्यक्ष कृष्णबहादुर महरावीच अनौपचारिक सहमतिपछि वार्ता भइरहेका बेलामा पुन र शर्माले महराविरुद्ध जेहाद छेडेका थिए ।
महरालाई कमजोर बनाउनकै लागि पुन र शर्माको मित्रता झाँगिएको थियो । जब सुन काण्डका महरा फसे त्यसपछि पुन र महरा पनि दुुईधारमा देखिन्छन् । यही बिचमा शर्मा भने विप्लवसँग सम्बन्ध सुधारको प्रयासमा लागेका छन् । पछिल्ला दिनमा विप्लवलाई ल्याएर महासचिव बनाए हुन्छ भनेर शर्मा नै बोल्न थालेका छन् ।
त्यसैलाई थप पुष्टि गराउनका लागि शर्मा कपिलवस्तुस्थित विप्लवको निवासमै गए । दशैंको अन्तिमतिर हिजो २०८१ असाेज २९ गते शर्मा कपिलवस्तु अन्तरगतकाे शिवराज नगरपालिका ९ शिवगढीस्थित महासचिव विप्लवको निवास भोकरमा असाेज २९ गते भेटघाट भएको हो । शर्मा विप्लवको निवासमा गएका हुन् । दुुईजनाको भेटलाई सार्वजनिक गरेर प्रचण्डलाई सन्देश दिन खोजेको अर्थमा पनि विश्लेषण भइरहेको छ ।
चर्चा भए अनुसार पछिल्ला दिनमा शर्मा पनि विप्लवलाई माओवादी केन्द्रमा ल्याउन राजी भएका छन् । तर, उनीहरु बाबुराम भट्टराईलाई पनि भित्र्याउनुपर्ने लाइनमा रहेका छन् ।
पछिल्ला दिनमा प्रचण्ड र बाबुरामको दुुरी बढेका कारण तत्काल संभव भने देखिएको छैन । तर, बाबुरामलाई पनि ल्याउनुपर्नेमा भने उनीहरु सहमत रहेको पनि बताइन्छ ।
विप्लवसँग शर्माको भेट र छलफल बाक्लो बनिरहेका बेलामा माओवादीकै अर्का नेता वर्षमान पुन भने पूर्वराष्ट्रपति विद्या भण्डारीसँग भेट गरेको स्रोतको भनाइ छ ।
स्रोतका अनुसार, पुनले भण्डारीसँग कुन र के विषयका लागि भेट गरे भन्ने चाहिं खुलेको छैन । यसले कतै नयाँ खिचडी पाक्न लागेको त होइन ? भन्ने आशंका उब्जिएको छ ।
