📚 “पुस्तक दिवस २०८२” रिडर्स क्लब, काडाघारीमा भव्य रूपमा सम्पन्न

काडाघारी, काठमाडौं । अन्तर्राष्ट्रिय पुस्तक दिवस तथा प्रतिलिपि अधिकार दिवसको अवसरमा रिडर्स क्लब, काडाघारीमा “पुस्तक दिवस २०८२” भव्य रूपमा सम्पन्न भयो। चर्चित साहित्यकार तथा समाजसेवी प्रकाश सायमीको अध्यक्षतामा सम्पन्न उक्त कार्यक्रममा पुस्तकको महत्व, यसको मौलिकता, तथा धार्मिक र ऐतिहासिक ग्रन्थहरूको सन्दर्भमा व्यापक छलफल गरियो।

कार्यक्रममा बोल्दै प्रा. डा. सनत कुमार वस्तीले गीता जस्ता ग्रन्थहरू लेख्नका लागि गहिरो आध्यात्मिक चेतना आवश्यक पर्ने बताउँदै, भगवान गणेशले "लेखन" आरम्भ गरेको सन्दर्भ सुनाए। “आज पनि हामी लेखाइ सुरु गर्नुअघि ‘श्री गणेशाय नमः’ लेख्ने परम्परा त्यो ज्ञानको निरन्तरताको प्रतीक हो,” उनले बताए।

त्यस्तै, साहित्यिक अनुसन्धानकर्ता शंकरमान सिंहद्वारा उपलब्ध गराइएका करिब १२८ वर्ष पुराना हस्तलिखित "गीता सार" र "तीर्थ यात्रा दैनिकी" पुस्तकको विशेष चर्चा गरियो। लेखक  वनमाली प्रसाद लाकौलका बाजे पाल्पा तानसेनका सुब्बा कृष्ण प्रसादद्वारा लेखिएको ती ग्रन्थहरू अहिले पनि मौलिकताको अद्वितीय उदाहरणका रूपमा प्रस्तुत गरिए।

कार्यक्रमको प्रमुख अनुप आचार्यले स्वागत मन्तव्य दिँदै रिडर्स क्लबको उद्देश्यमा प्रकाश पार्दै यस्ता कार्यक्रमले पठन-संस्कृति प्रवर्द्धनमा महत्त्वपूर्ण योगदान पुर्‍याउने बताए। उनले यो पुस्तक दिवसलाई एक दिनको उत्सव नभई निरन्तर प्रेरणाको श्रोत बनाउन सबैमा आग्रह गरे।

विक्रम भक्त जोशी, मनमोहन थपलिया, निशा केसी, सुवर्ण कर्माचार्यलगायत सहभागीहरूले आफ्ना गजल, कविता, गीत, संस्मरण र सिर्जनात्मक लेखन प्रस्तुत गरेका थिए। कार्यक्रमको विशेषता स्वरूप पुस्तक आदान-प्रदान पनि गरिएको थियो, जसलाई “एक दिनको इभेन्ट नभई निरन्तर प्रक्रिया”को रूपमा विकास गर्नुपर्ने सुझाव सहभागीहरूले दिएका थिए ।

यसैबीच, युनेस्कोद्वारा विश्व पुस्तक तथा प्रतिलिपि अधिकार दिवसको अवसरमा सन् २०२४ को विश्व पुस्तक राजधानीको रूपमा फ्रान्सको स्ट्रासबर्ग शहर चयन गरिएको जानकारी पनि गराइयो।

कार्यक्रमले सबै उमेरका पाठक, विद्यार्थी, अनुसन्धानकर्ता तथा नवप्रवर्तकहरूका लागि प्रेरणा दिने वातावरण सिर्जना गरेको सहभागीहरूको भनाइ छ।

📖 पुस्तक–मानव चेतनाको ऐना हो, यसलाई जोगाऔं, फैलाऔं !

     पुस्तक दिवसको शुभकामना !