फुङ्लिङ (ताप्लेजुङ), ३१ साउन । यही साउन २४ गतेदेखि सुरु भएको तेस्रो अन्तरराष्ट्रिय आमन्त्रण ताप्लेजुङ गोल्डकपको उपाधि सहलेश युवाक्लब सिरहाले जितेको छ । आज सम्पन्न फाइनल खेलमा सहलेशले चर्चब्वाइज युवाक्लब ललितपुरलाई २–० गोल अन्तरले पराजित गर्दै विजेता बनेको हो ।
खेलको ७९औँ मिनेटमा सुरेन खड्काले पहिलो गोल गरेका थिए भने ८९औँं मिनेटमा युसुकमलिकले दोस्रो गोल थप्न सफल भएका हुन् । ललितपुरले गोल फर्काउने प्रयास गरे पनि सफल नभएपछि उपविजेतामा चित्त बुझाएको छ ।
यसअघि सेमिफाइनलमा सहलेशले झापाको रेडस्टार फुटबल क्लबलाई २–० गोल अन्तरले हराएको थियो । चर्चब्वाइजले सुनसरीको दयङ ब्रदर्शलाई ट्राइबेकरमा ३–१ गोल अन्तरले पराजित गर्दै फाइनलमा प्रवेश गरेको थियो ।
गतवर्ष उपविजेता बनेको सहलेश युवाक्लबले यसपटक कमजोरी सच्याएर उपाधि आफ्नो पोल्टामा पारेको हो । क्लबमा चार विदेशी खेलाडीसमेत समावेश छन् । चर्चब्वाइजले भने विदेशी खेलाडीबिना प्रतिस्पर्धा गरेरै फाइनलसम्मको यात्रा तय गर्न सफल भएको हो ।
सहलेशले प्रतियोगिताभर क्वाटर फाइनल र सेमिफाइनलमा कुनै गोल नखाएर फाइनलमा पुगेको थियो । सोही क्रमलाई निरन्तरतामा दिँदै उसले उपाधि हात पारेको हो ।
चर्चब्वाइजले कठिन जितमार्फत फाइनलसम्म पुगे पनि उपाधि जित्न असफल रह्यो । आयोजक लाखेजात्रा सञ्चालक समितिका कोषध्यक्ष दावा शेर्पाका अनुसार विजेताले रु सात लाख दुई हजार ८२ सहित ट्रफी, मेडल र प्रमाणपत्र प्राप्त गरेका छन् । उपविजेता बनेको चर्चब्वाइजले रु तीन लाख ५० हजार ८२ सहित ट्रफी, मेडल र प्रमाणपत्र हात परेको छ ।
—
2025-05-19-08-05-38-800x533.jpeg)
