काठमाडौं । संसद् सचिवालयकी महिला कर्मचारीले यौन दुव्र्यवहारको आरोप लगाए पनि जिल्ला अदालत काठमाडौंबाट पूर्वसभामुख कृष्णबहादुर महराले सफाइ पाइसकेका छन् । अदालतबाट सफाइ पाएका महरा खासै चर्चामा छैनन् । कुनै समय प्रचण्डको अति विश्वासपात्र मानिने महरा नेकपाको पछिल्लो विवादमा कतातिर होलान् ? धेरैमा जिज्ञासा छ ।
स्रोतका अनुसार, महरा केपी ओलीसँग रुष्ट छन् । प्रकरण बल्झनुमा उनी स्वयं जिम्मेवार भए पनि प्रधानमन्त्री ओलीले बचाउ गर्ने भन्दा पनि फसाउन खाेजेकाे उनको बुझाइ छ । अध्यक्ष प्रचण्डसँग पनि महराले चित्त दुखाएका छन् । प्रचण्डका सबैजसो दुःख–सुखमा साथ दिँदा पनि आफ्नो दुःखमा असहयोग गरेको उनले आफू निकटस्थसँग बताउने गरेका छन् । त्यसैले उनी अहिले दुवै अध्यक्षकाे विवादमा कुनै पक्षमा खुलेका छैनन् ।
प्रचण्ड र ओली कतैतिर नखुले पनि पार्टी फुट्नु फुटाउनु हुन्न भन्ने सांसद महराको स्पष्ट मत रहेको बताइन्छ । व्यक्तिगत, गुटगत ढंगले नभई विधि र प्रक्रियामार्फत एकताको महाधिवेशन गर्नु उपयुक्त हुने भनाइ महराको रहेको उनीनिकट एक नेताले बताए ।
‘महरा कमरेड ओली र प्रचण्ड दुवै पक्षतिर खुल्नु भएको छैन,’ ती नेताले भने, ‘तर उहाँ पार्टीमा गुट उपगुट भत्काएर विधि र विधान, पद्धतिमा पार्टी चल्नु पर्ने र एकताकाे महाधिवेशनमा जानुपर्ने पक्षमा हुनुहुन्छ ।’
