काठमाडौं । कृषि कर्ममा लागेका पूर्वमन्त्री जयप्रकाश गुप्ता (जेपी) ले मल र कीटनाशक औषधिको बजारमा अभाव भएको गुनासो गरेका छन् । उनले समस्या समाधानका लागि प्रधानमन्त्री केपी शर्मा ओली र कृषिमन्त्री घनश्याम भुसाललाई गुहारेका छन् ।
पूर्वमन्त्री गुप्ताले मल अभावमा धानमा गबारो महामारी झै फैलिएको बताएका छन् । मल र कीटनाशक औषधि मात्र नभएर कृषि ज्ञानकेन्द्र पनि परामर्शमा उपलब्ध नभएको गुप्ताको गुनासो छ ।
‘समय बित्यो युरिया पाइएन । गवारो महामारीझैं फैलँदो छ,’ गुप्ताले प्रधानमन्त्री केपी शर्मा ओली र घनश्याम भुसाललाई मेन्सन गर्दै लेखेका छन्, ‘कीटनाशक प्रभावहीन देखिँदैछ । कृषि ज्ञानकेन्द्रहरू परामर्शमा समेत उपलब्ध छैनन् । १ बिघामा ५ केजी फोरेट हालेर किसान विष फलाउँदैछन् ।’
![\"\"](\"https://sanghunews.com/uploads/news/images/tweet.PNG\")
सबैले चर्चा गर्ने क्षेत्र ठूलो उपेक्षामा परेको उल्लेख गर्दै गुप्ताले यसलाई आलोचनाका रूपमा मात्र नलिने प्रधानमन्त्री र कृषिमन्त्रीलाई आग्रह गरेका छन् ।
गुप्ता भ्रष्टाचार अभियोगमा अदालतबाट कैद भुक्तान गरेका व्यक्ति हुन् । जेलबाट निस्किएपछि केही समय राजनीतिमा पुनरागमन हुने कसरत गुप्ताले गरेका थिए । तर उनको प्रयासले आकार लिन नसकेपछि उनी कृषि कर्ममा लागेका छन् । गृहजिल्ला सप्तरीको धरमपुरमा गुप्ताले तरकारी, फलफूललगायतको खेती गरिहेका छन् ।
माओवादी आन्दोलनबाट उदाएर मन्त्रीसमेत बनेका लोकेन्द्र बिष्ट पनि राजनीतिबाट ओझेलिएर कृषि पेसामा लागेका छन् । उनले दाङमा गरिरहेको ड्रागन खेतीलाई धेरैले उदाहरणीय कर्म गरेको टिप्पणी गरेका छन् ।
विद्वान कृषिमन्त्री आउँदा पनि समस्या र अवस्था उस्तै
रकम तिरेर समयमै रसायनिक मल नपाउने समस्या वर्षौं परानो हो । नेकपाका सैद्धान्तिक, बौद्धिक र इमान्दार नेता घनश्याम भुसालले कृषि मन्त्रालयको नेतृत्व सम्हालेपछि रसायनिक मलको अभाव नहुने किसानले अपेक्षा गरेका थिए । तर विद्धान कृषिमन्त्री देशले पाउँदा पनि किसानले रकम तिरेर खरीद गर्ने मलसमेत प्राप्त गर्न सकेनन् ।
प्रदेशमा भूमि व्यवस्था, कृषि तथा सहकारी मन्त्रालय छन् । तिनले पनि कृषकको समस्या समाधान गर्न कुनै कदम चालेका छैनन् ।
