सशस्त्रका ६ एसएसपीको बढुवा सिफारिस   

काठमाडौं । सशस्त्र प्रहरी बल (एपीएफ) का ६ वरिष्ठ उपरीक्षक (एसएसपी) को नायब महानिरीक्षक (डीआईजी) मा बढुवा सिफारिस गरिएको छ । 

बढुवा समितिको ०७७ पुस १६ को बैठकले ६ एसएसपीलाई डीआईजीमा बढुवा गर्न सिफारिस गरेको गृह मन्त्रालयले जनाएको छ । 

एसएसपीबाट डीआईजीमा बढुवा सिफारिस भएकामा कमल गिरी, गणेशबहादुर ठाडा मगर, अभिकुमार खत्री, कुलबहादुर नेम्वाङ, दुर्गाप्रसाद भट्टराई र शम्भु सुवेदी छन् । 

सशस्त्र प्रहरी नियमावली, २०७२ को नियम ३९ को उपनियम (१) (ख) बमोजिम बढुवा सिफारिस गरेको गृहले यसबारे असन्तुष्टि रहे ७ दिनभित्र उजुरी गर्न भनेको छ ।

सशस्त्र प्रहरी नियमावलीमा जुन पदकालाई बढुवा गरिएको हो सोही पदकाले चित्त नबुझेको अवस्थामा उजुरी दिनसक्ने प्रावधान छ । तर यो कर्मकाण्डी मात्र देखिन्छ । एकाधबाहेक गृहले गरेका सबै बढुवा सिफारिस कार्यान्वयन भएका नजिर छन् । 

बढुवा समितिले गरेको सिफारिसमा कुनै उजुरी नपरेमा त्यसलाई गृहले मन्त्रिपरिषद्मा लैजाने छ । मन्त्रिपरिषद्ले बढुवा स्वीकृत गरेपछि मात्रै बढुवा सिफारिस कार्यान्वयनमा आउने छ ।