काठमाडौं । अमेरिकी राष्ट्रपति जो बाइडनले यमनमा हुथी विद्रोहीविरुद्धका आक्रमणमा सहायता नगर्ने घोषणा गरेका छन् ।
बाइडनका दुई पूर्ववर्ती बाराक ओबामा र डोनाल्ड ट्रम्पले यमन युद्धमा सहायता गरेका थिए । त्यसलाई बाइडनले खारेज गरिदिएका छन् ।
आफ्नो विदेशनीतिबारे पहिलो पटक विज्ञप्ति जारी गर्दै बाइडनले भनेका छन्- ‘यमनमा युद्ध अन्त्य हुनुपर्छ ।’
यस्तो घोषणासँगै अब अमेरिकाले यमनका हुथी विद्रोहीविरुद्धका कारबाही प्रदान गर्दै आएको समर्थन रोक्ने छ । यति मात्रै होइन, साउदी अरेबिया र संयुक्त अरब इमिरेट्सलाई हतियार बिक्री गर्न पनि उसले बन्द गर्नेछ ।
यमन आक्रमणबाट फिर्ता लिने घोषणालाई ट्रम्प प्रशासनको नीतिमा परिवर्तन गर्ने बाइडनको संकेतका रूपमा विश्लेषण गरिएको छ ।
बाइडनले अमेरिकाको विदेश नीतिमा यमनको विषयबाहेक अन्य परिवर्तनहरू पनि घोषणा गरेका छन्।
त्यसैगरी, बाइडनले यमनका लागि नयाँ दूत नियुक्त गर्ने तयारी गरेको बीबीसीले जनाएको छ । त्यसमा टिम लेन्डरकिंगलाई नियुक्त गर्ने ठानिएको छ। उनी मध्यपूर्व मामिलाका विज्ञ हुन् । कूटनीतिमा पनि उनको उत्तिकै अनुभव छ ।
६ वर्षभन्दा लामो समयदेखि जारी युद्धमा यमनमा एक लाख १० हजारभन्दा बढी मानिसहरूले ज्यान गुमाइसकेका छन् ।
