काठमाडाैं । नेपाली सेनाले निर्माणको जिम्मेवारी पाएको कर्णाली करिडोर अन्तर्गत खुलालु-लैफु-सलीसल्ला सडक खण्डको कार्य सम्पन्न गरि २०७८ असार ३१ गते नेपाली सेनाका कर्णाली करिडोर सडक निर्माण कार्यदलका प्रमुख प्राविधिक सेनानी मिलन कार्कीले उत्तर दक्षिण व्यापारिक मार्ग हिल्सा-सिमिकोट सडक आयोजनाका योजना प्रमुख बिष्णुदास लामालाई एक कार्यक्रमका बीच हस्तान्तरण गरिएको छ ।
२०७१ साल चैत्र ०९ गतेबाट निर्माण शुरु गरिएको कुल १२२.७५ कि.मि. लम्बाई र औसत ६ मिटर चौडाई रहेको उक्त सडक खण्डले कालिकोट, बाजुरा र हुम्ला जिल्लालाई जोडेको छ ।
यस सडक खण्डको निर्माण पश्चात राष्ट्रिय सडक सञ्जालमा जोडिन बांकी रहेको अन्तिम जिल्ला हुम्लाको ताँजाकोट, अदानचुली, चंखेली र सर्केगार्ड गाउँपालिका समेत उक्त सडक सञ्जालमा जोडिएका छन् ।
भौगोलिक विकटता, मौसमी प्रतिकुलता, कडा चट्टानयुक्त भू-बनोट आदिका कारण यस सडक खण्डलाई विशेष परिस्थितिको सडकको रुपमा परिभाषित गरि २०७१ साल चैत्र ०५ गतेको मन्त्रिपरिषद्को निर्णयबाट नेपाली सेनालाई जिम्मा दिईएको थियो ।
