काठमाडाैं । एमाले र एकीकृत समाजवादीका नेताहरुवीच पार्टी एकताभन्दा पहिला कार्यगत एकता गर्नेगरी नेताहरु छलफलमा जुटेका छन् । एमाले स्राेतका अनुसार, एमालेका उपाध्यक्ष सुरेन्द्र पाण्डे, उपमहासचिव पृथ्वी सुब्बा गुरुङसहितका नेताहरु अहिले एकीकृत समाजवादीका नेताहरुलाई फकाउने प्रयासमा लागेका छन् ।
स्रोतका अनुसार, उनीहरुले एमाले बनाउने हामी अनि एमाले भन्दा बाहिर किन बस्ने भन्दै नेताहरुलाई फकाईरहेका छन् । झलनाथ खनाल, मुकुन्द न्यौपानेसहितका नेताहरु एमालेसँग मिल्नुपर्ने लाइनमा आएका छन् तर उनीहरु तत्काल एकता गर्नेभन्दा पनि चुनावी कार्यगत एकतामा पक्षमा बढी लागेका छन् ।
एमालेभित्र संघीय चुनावपछि राष्ट्रपति झलनाथ खनाललाई बनाउने गरी भित्र्याउन सकिने पनि बताउन थालेका छन् । अहिलेकै गठबन्धनमा रहँदा कांग्रेसबाट रामचन्द्र पौडेल राष्ट्रपति हुनसक्ने भएकोले पनि झलनाथ वामपन्थीहरुको एकता वा कार्यगत एकता गरेर जानुपर्ने पक्षमा उभिएका हुन् ।
त्यही कारण पछिल्ला दिनमा माधव नेपाल पनि एमालेप्रति सकारात्मक बन्दै गएका छन् । माधव नेपालले बागमती प्रदेश कमिटीको पूर्ण बैठकमा ''एमालेलाई धेरै गाली नगर्नु'' भन्नुले पनि माधव नेपाल एमालेप्रति र कार्यगत एकता वा एकताको पक्षमा सकारात्मक बन्न थालेको बताइन्छ । २०७९ असार ३१ गते हिजाेको बैठकमा माधव नेपालले एमालेविरुद्ध धेरै आक्रोश पोख्न नहुने बताएका थिए । ''एमालेले पनि गाली नगरेका कारण आफूहरुले पनि नगर्ने बताएका हुन् ।''
एकीकृत समाजावदीमा अधिकांश नेताहरु अहिले एमालेसँग मिल्नुपर्ने पक्षमा देखिएका छ्न् । त्यही दबाबका कारण पनि माधव नेपाल एमालेप्रति नरम बन्न थालेका बताइएको छ । सुदूरपश्चिम प्रदेशमा सांसद तारा लामा र पूर्णा जोशीले बजेट पारित हुने दिन संसद बैठक बहिस्कार गर्नु पनि त्यही दबाबसँग जोडिएको पनि बताइन्छ । स्राेत भन्छ, जिल्लाका नेताहरुमार्फत किसान श्रेष्ठ, प्रेम आलेलायतका सांसद पनि एमाले नेताहरुको सर्म्पकमा पुगेका छन् ।
