धनगढी, २३ वैशाख : होटेल साथीले सञ्चालन गरेको क्यासिनोमा प्रहरीले आइतबार अपराह्न छापा मार्दा नेपालमा चलनचल्तीमा नरहेको दशलाख पाँच हजार भारतीय मुद्रा बरामद भएको छ ।
होटेलको क्यासिनोमा छापा मारेर नेपालमा चलनचल्तीमा नरहेका रु ५०० र रु दुईहजार दरका भारतीय मुद्रा बरामद गरिएको जिल्ला प्रहरी कार्यालयका प्रवक्ता वीरबहादुर बुढामगरले जानकारी दिए । प्रहरीले साथी होटेलका व्यवस्थापक सुजन दाहाललाई सोधपुछका लागि नियन्त्रणमा लिएको छ ।
बरामद भएको भारु आन्तरिक राजश्व अनुसन्धान विभागमा पठाउने तयारी गरिएको छ । उक्त होटेलमा ‘किंग्स लञ्ज ग्यामिङ क्लब’ नामको क्यासिनो सञ्चालनमा रहेको छ ।
