काठमाडौं । देशको विभिन्न स्थानमा मृत अवस्थामा पाँच जना फेला परेका छन् । काठमाडौंको चन्द्रागिरी नगरपालिका–१४ नैकाप आदर्श टोलस्थित निर्माणाधिन घरमा मिस्त्री काम गर्ने ३८ वर्षीय राजु श्रेष्ठ सोही ठाउँस्थित शौचालयभित्र शुक्रबार मृत अवस्थामा फेला परेका छन् ।
यसैगरी काठमाडौंको बुढानिलकण्ठ नगरपालिका–१० कपन शिवमन्दिर नजिक सडक पेटीमा हाल पहिचान नखुलेका करिब ३० वर्षीय पुरूष शुक्रबार मृत अवस्थामा फेला परेका छन् । रूपन्देहीको प्युठान गौमुखी गाउँपालिका–५ घर भई सिद्धार्थनगर नगरपालिका–३ डेरा गरी बस्ने ४० वर्षीय खुमन सिंह पाण्डे आफ्नै कोठामा शुक्रबार मृत अवस्थामा फेला परेका छन् ।
रूपन्देहीको तिलोत्तमा नगरपालिका–१२ बिजयनगर बस्ने ३८ वर्षीया फुलमाया बिक आफ्नै घर नजिकको कुलोमा शुक्रबार मृत अवस्थामा फेला परेकी छन् । सिरहाको सुखिपुर नगरपालिका–६ खरिटोल बस्ने २५ वर्षीया मन्जु राम आफ्नै घरबाट करिब १ किलोमिटर टाढा रहेको पोखरीमा शुक्रबार मृत अवस्थामा फेला परेकी छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।
