काठमाडौं । नेपाल कम्युनिष्ट पार्टी एकताका क्रममा जिल्ला जिल्लाको नेतृत्व चयनका बारेमा पनि चर्चा सुरु भएको छ । देशको राजधानी काठमाडौंमा पूर्वमाओवादी केन्द्रको खासै प्रभाव नभएकाले अध्यक्ष एमालेकै भागमा पर्ने भएको छ । काठमाडौको अध्यक्षका लागि तीन नेतृको नाम चर्चामा छ । काठमाडौको अध्यक्षका लागि मनमोहन अधिकारीकी बुहारी शान्ति अधिकारीको नाम अग्रपंक्तिमा लिन थालिएको छ ।
पहिलो कम्युनिष्ट प्रधानमन्त्री मनमोहन अधिकारीकी बुहारी शान्ति काठमाडौं जिल्ला कमिटी सदस्य र अनेमसंघको स्थायी समिति सदस्य हुन् । पूर्वसांसद शान्ति शिक्षित र संघ÷संस्था संचालन गर्नसक्ने काबिल महिलामध्येमा पर्दछिन् । अधिकारीलाई जिल्ला अध्यक्ष बनाउनुपर्ने पक्षमा एक तप्का लागेको छ ।
काठमाडौंको जिल्ला अध्यक्षमा काठमाडौं जिल्लाको नेतृत्वमै रहेकी सरिता न्यौपानेको दाबी पनि सशक्त नै छ । उनी समानुपातिक सांसद हुन् । सामान्यतया सांसदलाई पार्टीको नेतृत्वको जिम्मेवारी पनि दिनु नहुने पक्षमा पार्टीका नेताहरूबीच एकखालको सहमति भइसकेकाले उनको संभावना कम देखिन्छ । काठमाडौंको अध्यक्षमा अर्की नेतृ इन्दिरा पन्तले पनि दाबी गरेकी छन् । सामाजिक संघ÷संस्थाका अलावा सहकारीमा समेत जोडिएकी पन्त युवानेता तथा प्रदेश सांसद वसन्त मानन्धरकी श्रीमती हुन् ।
