देवघाट, २३ माघ । देवघाटधाममा कर्मकान्ड गर्ने पण्डित (पुरोहित) हरुलाई परीक्षा लिइएको छ । देवघाट क्षेत्र विकास समितिले बेणी संगममा चितवन तर्फ बसेर कर्मकान्ड गर्नको लागि पण्डितहरुलाई मौखिक परीक्षा लिएको हो ।
परीक्षामा उनीहरुको प्रस्तुतीको आधारमा कर्मकान्ड गर्ने प्रमाणपत्र दिईने क्षेत्र विकास समितिले जनाएको छ । पन्डितहरुको प्रस्तुतीको आधारमा उनीहरुले गराउने कर्मकाण्डको प्रकारको प्रमाणपत्र लिईने क्षेत्र विकास समितिका कार्यकारी निर्देशक सदन बरालले बताए । पण्डितहरुले प्रमाणपत्रमा उल्लेख बाहेकको अन्य कार्य गरेको भेटिए कारवाही गरिने कार्यकारी निर्देशक बरालले बताए ।
देवघाटधाममा बस्ने पण्डितहरुले विधि नपुर्याइ कर्मकान्ड लगायतका धार्मिक काम गरेको गुनासो आएपछि क्षेत्र विकास समितिले परीक्षा लिएको हो । साथै देवघाटका पण्डितहरुले भक्तजनसँग धेरै रकम असुलेको गुनासो आएपछि त्यस्तो कार्यलाई नियमन गर्न पनि परीक्षा लिइएको समितिले जनाएको छ ।
पण्डित परीक्षा समितिका संयोजक तथा विज्ञ एवं सिताराम संस्कृत मावि देवघाट चितवनका सहायक प्राचार्य अर्जुन पाण्डेयले सबै विधि नजानेका पण्डितहरुबाट धेरै भक्तजन ठगिएको र विधि नपु¥याई कर्मकाण्ड हुने गरेको जनगुनासो आएपछि त्यसलाई व्यवस्थित गर्न परीक्षा लिइएको बताए ।
पाण्डेयका अनुसार उक्त परीक्षामा ९ जना पण्डित सहभागी भएकोमा एक जनाले मात्रै कर्मकान्डका सबै विधि गर्न पाउने गरी उत्तिर्ण भएका छन् भने बाँकी मध्ये केहीले श्राद्ध मात्रै, केहीले ब्रतन्बन्ध मात्रै गराउन पाउने प्रमाणपत्र पाउनेछन् ।
