नेकपा (माओवादी केन्द्र) द्वारा उम्मेदवार सिफारिस

बाबियाचौर, म्याग्दी, १२ असोज (रासस)  आगामी मंसिरमा हुने संघ र प्रदेशसभा निर्वाचनका लागि नेकपा (माओवादी केन्द्र), म्याग्दीले उम्मेदवारको नाम सिफारिस गरेको छ । 
 

नेकपा (माओवादी केन्द्र) म्याग्दीको बुधबार बेनीमा केन्द्रीय कार्यालय सदस्य अमिक शेरचनको आतिथ्यमा बसेको बैठकले प्रत्यक्ष र समानुपातिकतर्फका उम्मेदवारको नाम प्रदेश र केन्द्रीय कमिटीमा सिफारिस गरेको हो । 
 

मंसिर १० गते पहिलो चरणमा चुनाव हुन लागेको म्याग्दीमा संघमा एक र प्रदेशमा दुई वटा निर्वाचन क्षेत्र रहेको छ । संघको प्रत्यक्षतर्फ जिल्ला संयोजक तथा पूर्व सभासद् गोविन्द पौडेल, खुमनाथ सुवेदी र चन्द्रबहादुर घिमिरेलाई सिफारिस गरिएको सचिवालय सदस्य शेरबहादुर केसीले जानकारी दिनुभयो । 
 

यसैगरी, समानुपातिकतर्फ विश्वसेन मल्ल र यामन रोकाको नाम सिफारिस भएको छ । प्रदेशसभाको क्षेत्र नं १ को प्रत्यक्षतर्फ सुवास विक र हरि भण्डारी, २ मा पुनम खड्का, याम रोका र राजेन्द्र शेरचनलाई सिफारिस गरिएको छ । 
 

प्रदेशको समानुपातिकतर्फ क्षेत्र नं १ मा ईन्द्रबहादुर पुन, हेमा छन्त्याल र लालकुमारी पुन तथा क्षेत्र नं २ बाट टेकबहादुर विक र होमलाल पुनको नाम सिफारिस भएको छ । प्रदेशसभाको क्षेत्र नं १ मा बेनी नगरपालिका, रघुगंगा र अन्नपूर्ण गाउँपालिका तथा क्षेत्र नं २ मा मंगला, मालीका र धौलागिरि गाउँपालिका रहेका छन् । 
 

संघको निर्वाचनका लागि एउटा निर्वाचन क्षेत्र र ४५ वटा वडा रहेको म्याग्दीमा वैशाख ३१ गते भएको स्थानीय तह निर्वाचनमा ७१ हजार ३६३ जना मतदाता रहेका थिए । नेपाली काँग्रेस र नेकपा (एमाले) ले पनि उम्मेदवार सिफारिसको प्रक्रिया अघि बढाएको जनाएका छन् । 
–––