काठमाडाैं । एकीकृत समाजवादी (एस)ले महाधिवेशनमा चुनाव छलेर आएपनि पदाधिकारी चयनमा अब चुनाव गर्न लागेको बताएकाे छ । पदाधिकारी चयन गर्दा चुनावबाट गर्ने भएपछि अध्यक्ष माधव नेपालको रणनीति रहस्यमय देखिएको छ । माधव नेपाल सुरुमा केन्द्रीय कमिटीमा चुनाव गर्न नहुने पक्षमा रहेका थिए ।
स्राेत भन्छ, पछिल्ला दिनमा झलनाथ खनाल आफ्नो टीममा आएपछि उनी चुनावी माहोलको पक्षमा उभिएका हुन् । आफू सर्वसम्मतिबाट अध्यक्ष भएपछि बाँकीलाई चुनावबाट अघि सार्न खोज्नुको रहस्य चाहिँ महासचिव घनश्याम भुसाललाई देखाईदिने नीतिसँग जोडिएको अनुमान नेताहरूले गरिरहेका छन् ।
एकीकृत समाजवादीभित्र चलेको चर्चा अनुसार, अध्यक्ष नेपाल र महासचिव भुसालको दूरी निकै बढेको छ । असन्तुष्टि बढेपछि अध्यक्ष माधव नेपाल पछिल्ला दिनमा भुसालको समूहका नेतालाई चुनावबाट हराईदिने पक्षमा रहेका छन् । आफूनिकटका नेताहरुलाई त्यही सन्देश दिनेगरी नेपालले रणनीति बनाएका हुन् ।
झलनाथ खनालले भने ढुलमुले, अविश्वसनीय चरित्र देखाएर यता र उता गर्दै हिड्न थालेका कारण नेपालको रणनीति सफल भएको बताइन्छ । नेपालको रणनीति सफल भएमा एसमा भुसालको समूहका नेताहरु पदाधिकारीमा नआउने अवस्था रहेको छ । खनाल र भुसाल मिलेको अवस्थामा चाहिं नेपाल पक्षका नेताहरु पदाधिकारीमा निर्वाचित नहुने संभावना रहेको छ ।
