काठमाडाैं । कांग्रेसले धोका दिएपछि टानको अध्यक्षमा एमाले र कांग्रेसको गठबन्धनबाट चुनाव उठेका राजेन्द्रप्रसाद सापकोटा पराजित भएका छन् । एमाले र कांग्रेसको सत्तागठबन्धनले सापकोटाको नेतृत्वको प्यानल बनाएको थियो ।
सत्ता गठबन्धनको प्यानलविरुद्ध माओवादी केन्द्रले सागर पाण्डेको नेतृत्वमा प्यानल बनाएको थियो । टानको नयाँ नेतृत्वका लागि २०८१ भदाै १७ गते दिउँसो चुनाव भएको थियो ।
चुनावमा कांग्रेसको ठूलो पंक्तिले सापकोटाले असहयोग गरेको ठमेलमा चर्चा भएको छ । पूर्वसहमति अनुसार एमालेले अध्यक्ष र महासचिव कांग्रेसले पाएको थियो । तर, यी दुवै पद कांग्रेस र एमालेले गुमाएका छन् ।
एमालेको असन्तुष्ट पक्षले महासचिव हराउन खोज्दा कांग्रेसको असन्तुष्ट पक्षले अध्यक्ष हराउन भूमिका खेलेका थिए । त्यही कारण दुवै पराजित भएको बताइएको छ ।
पाण्डेले सापकोटालाई एक सय मतले जितेका छन् । यो हारसँगै एमाले र कांग्रेसभित्र भने विवाद बढ्न थालेको छ । कांग्रेसभित्र चार वटा टीम रहेका थिए ।
चारवटा मध्ये दीपक महतको टीममात्रै सापकोटाको पक्षमा लागेको चर्चा पनि छ । रामशरण थपलिया, देवेन्द्र वाग्ले र नीलहरी वास्तोलाको टीम पाण्डेको पक्षमा लागेको बताइएको छ ।
