काठमाडाैं । छत्तिस वर्षदेखि निरन्तर अध्यक्ष रहेका माओवादी केन्द्रका अध्यक्ष पुष्पकमल दाहाल प्रचण्ड उपमहासचिव जनार्दन शर्माका कारण समस्यामा पर्दै गएका छन् ।
निरन्तर शर्मासँग टकराव गर्नुपर्दा प्रचण्डमाथि दबाब त बढेको छ नै वर्षमान पुनलाई पनि टाउको दुखाईको विषय बन्न थालेको माओवादी नेताहरुले टिप्पणी गर्न थालेका छन् ।
विगतमा वर्षमान पुन र जनार्दन शर्माको प्रतिस्पर्धा भएको माओवादी चर्चा थियो । तर, शर्माले पुनलाई ओभरटेक गरेर प्रचण्डसँग प्रतिस्पर्धा गर्न थालेपछि पुन दोस्रो तहमै रोकिएका छन् ।
माओवादी नेताहरुको टिप्पणी अनुसार अब गुटको भागबण्डा हुँदा पनि बर्षमान पुन र जनार्दन शर्माको होइन, प्रचण्ड र जनार्दन शर्मावीच हुने भयो ।
पुन प्रचण्डकै गुटमा हुने भएपछि शर्मा रणनीतिक रुपमा पुनलाई साइजमा राख्न सफल भएको चर्चा पनि हुन थालेको छ । आफ्नो मान्छेको संरक्षणमा शर्मा अहिले निकै लागेका छन् ।
सुदूरपश्चिम प्रदेशको इञ्चार्ज, सहइञ्चार्ज र संसदीय दलको प्रमुखको राजनीति त्यसैमा केन्द्रित रहेको छ । शर्माले आफ्नो मान्छेलाई हटाएको भन्दै खगराज भट्टको पक्षमा शर्मा खुलेर लागेकामात्र छैनन्, प्रचण्डलाई निर्णय फिर्ता गराउन बाध्य पारिरहेका छन् । पुन भने उनको उक्त लडाईमा रमितेजस्तामात्रै देखिएका छन् ।
यता, कर्णाली प्रदेशको हकमा पनि प्रचण्डले त्यही गरिरहेका छन् । त्यसले गर्दा प्रचण्डले शर्माको धारणालाई पनि सहभागी गराउने गरी नयाँ सर्कूलर गरेका छन् ।
दुुईदिनअघिको प्रचण्डको नयाँ सर्कूलर अनुसार पार्टीको स्थायी कमिटीमा शर्माले राखेको लिखित १४ पाने धारणालाई प्रचण्डले केन्द्रीय समितिको बैठकमा पुरक प्रतिवेदनको रुपमा समेट्ने सर्कुलरमै उल्लेख गरेका छन् ।
