काठमाडौँ, १८ कार्तिक । दिदीबहिनी नहुनेका लागि भाइटीका लगाउन आज एकदिन काठमाडौँको रानीपोखरीको बीचमा रहेको बालगोपालेश्वर मन्दिर खुला हुने गर्छ ।
अन्य वर्ष झैँ यस वर्ष पनि मन्दिरमा भाइटीका लगाउनहरुको बिहानैदेखि भिड लागेको थियो । तर भक्तजनलाई लक्षित गरेर बनाएको शौचालय गइनसक्नु भएपछि भक्तजन मारमा परेका छन् ।
पुरुष शौचालयमा अहालमा जस्तै पानी जमेको छ । शौचालयमा छिर्दा नाक थुन्नुपर्छ । शौचालयको प्यानहरु गुट्खा, सुर्ति तथा चुरोटका खोलहरुले भरिएको छ । महानगरले ध्यान नदिएकोमा दु:ख व्यक्त गर्दै भक्तजन रामहरि सुवालले भने,'सहरकै त यस्तो हालत छ झन गाउँमा त के होला !'
हजारौं सङ्ख्यामा आएका भक्तजनलाई शौचालयको अभाव भएपछि बाहिर एकजनालाई ढोकामा कुरुवा राखेर पुरुषले पनि महिला शौचालय प्रयोग गरेका थिए ।
काठमाडौँ महानगरपालिकाले काठमाडौँकै मुटुमा रहेको रानीपोखरीमा एउटा राम्रो शौचालय समेत व्यवस्थापन गर्न नसक्दा शौचालयले महानगरलाई गिज्याएको छ ।
