काठमाडौं । वागमती प्रदेशतर्फ रिक्त राष्ट्रिय सभा सदस्य उपनिर्वाचनमा राष्ट्रिय प्रजातन्त्र पार्टीले एमालेलाई सघाउने छनक दिएको छ ।
राप्रपाका अध्यक्षत्रय पशुपतिशमशेर जबरा, कमल थापा र प्रकाशचन्द्र लोहनीलगायत नेताबीच शनिबार भएको छलफलमा राष्ट्रियसभा निर्वाचनबारे छलफल भएको थियो । सो क्रममा थापाले एमालेबाट सहयोगका लागि अनौपचारिक प्रस्ताव आएको जानकारी गराएका थिए । बैठकमा सहभागी एक नेताका अनुसार यसमा सबै नेताले सहमति जनाएका छन् । तर यसका लागि औपचारिक प्रस्ताव आउनुपर्ने मत नेताहरूले राखेका छन् ।
राष्ट्रिय सभाको जेठ ६ गते उपनिर्वाचन हुँदैछ । जसमा रामबहादुर थापा बादल एमाले र खिमलाल देवकोटा कांग्रेस माओवादी केन्द्र गठबन्धनबाट मैदानमा खडा भएका छन् । विपक्षी गठबन्धनका उम्मेदवार भए पनि देवकोटा माधवकुमार नेपाल निकट संघीयताविद् हुन् । एमाले विवादले नयाँ मोड लिए पनि उनले आफ्नो उम्मेदवारी यथावत् राख्ने बताएका छन् ।
त्यसैगरी, राप्रपाको आजकै बैठकले पार्टी महाधिवेशन स्थगित गर्ने निर्णय पनि गरेको छ ।
जेठ २२–२५ का लागि तय महाधिवेशन कोरोना महामारीको कारण देखाउँदै स्थगित गरिएको हो ।
उपयुक्त समयमा गर्नेगरी महाधिवेशनको घोषित सबै कार्यक्रम स्थगित गरिएको राप्रपाका एक नेताले जानकारी दिए ।
तीन टुक्रामा विभाजित राप्रपाबीच ०७६ फागुन २८ मा एकता भएको थियो । एकतापछि संक्रमणकालका लागि ३ अध्यक्षको प्रबन्ध गरेको राप्रपाले शीघ्र महाधिवेशन गरेर नेतृत्वबारे टुंगो लगाउने बताएको थियो ।
नेतृत्वका लागि यसपटक पुरानाका अतिरिक्त नयाँ अनुहारले पनि चाहना राखेका थिए । तर महामारीले दोस्रोपटक पनि महाधिवेशन स्थगित बनेपछि राप्रपाको नेतृत्व लिन हतार गर्नेहरूको चाहनामा ठेस पुगेको छ ।
