काठमाडौं । राष्ट्रिय सभाको बैठकमा प्रतिपक्षका सांसदले उठेर सदन अवरुद्ध गराएलगत्तै सत्ता पक्षका सांसद समेत उठेर विरोध जनाएका छन् । शुक्रबार बसेको राष्ट्रिय सभा बैठकमा सांसदहरुले आफ्ना कुरा राखेपछि एमाले सांसद विमला राई पौडेलले सुन प्रकरणको छानबिनका लागि समिति गठनको माग यथावत रहेको भनेसंगै एमाले सांसद उठेर विरोध गरेका थिए । लगत्तै सत्ता पक्षका सांसदसमेत उठेर विरोध जनाएपछि अध्यक्ष गणेश तिमिल्सिनाले पटक पटक बस्न आग्रह गर्दै, कार्यसूची अघि बढाउन सहयोगका लागि आग्रह गरे ।
उनले सत्ता पक्षका सांसद समेत उठेपछि हास्दैँ भने ‘ कि उठी उठी बैठक चलाउन नयाँ अभ्यास सुरु गर्ने होकी’ ‘जसरी एकसाथ उभिनु भएको छ । त्यसैगरी एकसाथ बसिदिनुहोस् । म माननीय ज्यूहरुलाई आग्रह गर्छु । ’उनले भने । ‘अघि बढाउन हाम्रा केही कार्यसूची केही लामो समयदेखि रोकिएका छन् । यीनलाई अगाडि बढाउँ । ’ झण्डै १० मिनेट लगातार प्रतिपक्ष दलका सांसदसहित सत्ता पक्षका सांसदसमेत उठेर विरोध जनाएपछि अध्यक्ष तिमिल्सिनाले बैठकका सबै कार्यसूची हटाएर बैठक ३१ गते दिउसो एकबजे बस्ने गरी स्थगित गरेका छन् ।
