काठमाडौं । माओवादी केन्द्रका सांसद माधव सापकोटाले आगामी चुनावमा एक्लै लड्दा पनि सफलता हासिल गर्ने गरि तरिकाले काम गर्ने बताएका छन् ।
२०८० भदाै १६ गते शनिबार माओवादी रुपान्तरण अभियान अन्तरगत चन्द्रागिरि २ मा आयोजित कार्यक्रममा उनले अब तीन महिनाभित्र सक्दो तयारी गरेर आगामी चुनावमा एक्लै चुनाव लड्ने गरी तयारी गरिने बताए ।
उनले भने, ‘अब तीन महिनाभित्रमा ६५ जनाको नगर समिति यसलाई हामी सुदृढ बनाउँछौ, १५ वटा नगरअन्तरगतका वडा समितिहरु छन् यसलाई व्यवस्थित गर्ने हाम्रो योजना रहेको छ । थप २२ वटा बुथ कमिटिहरु निर्माण गर्छौ नगर समितिका सदस्यहरुको नेतृत्वमा २२ वटा बुथहरु बनाएर, ९९ सय वटा वडाहरुलाई आधार मानेर टोल कमिटिहरु बनाउँछौ । ८ हजार ७ सय ७५ जना हाम्रा सदस्यहरु निर्माण गर्ने गरि भोलिदेखि काम गर्ने छौ । यसरी आगामी चुनावमा एक्लै लड्दा पनि सफलता हासिल गर्ने गरि काम गर्ने छौ ।’
उनले केही आन्तरिक व्यवस्था र बाहिरी हस्तक्षेपको तालमेल मिलाउँन नसक्दा जित्ने पालिका पनि गुमाएका भन्दै अब नेता, कार्यकर्ताहरु र जनताको सक्रियताको तालमेल मिलाएर अगाडि बढ्ने बताए ।
उनले भने, ‘नेता कार्यकर्ताहरु र जनताको सक्रियता हेर्दा थोरै तालमेल मिलाउँदा गएको स्थानिय चुनावमा हामीले एक्लै चुनाव लडेको भएपनि मेयर उपमेयरसमेत जित्न सक्ने जस्तो स्थिति रहेछ । केही आन्तरिक व्यवस्थाहरु र बाहिरको हस्तक्षेपको तालमेल मिलाउँन नसक्दा जित्ने पालिका गुमाएका रैछौ भन्ने कुरा अनुभूति भएको छ । ’
