काठमाडौं । देशका विभिन्न विद्यालयमा कार्यरत साढे ११ हजार शिक्षकले सम्पत्ति लुकाएका छन् । सरकारलाई वार्षिक रुपमा दिनुपर्ने जानकारी नबुझाएर उनीहरूले सम्पत्ति सार्वजनिक नगरेका हुन् । मुलुकभर हाल एक लाख सात हजार ८५३ शिक्षक छन् । यहीभित्र अस्थायी सेवा गर्ने शिक्षक पनि छन् ।
विद्यालय शिक्षक किताबखानाका अनुुसार आर्थिक वर्ष २०७४–०७५ मा करीब ११ हजार ६२३ शिक्षकले सम्पत्ति विवरण बुझाएका छैनन् । करीब ७९ हजार ३१ शिक्षकमध्ये ६७ हजार ४०८ शिक्षकले मात्र सम्पत्ति विवरण बुझाएको किताबखानाले जनाएको छ । शिक्षकलाई साउनदेखि भदौ २८ गतेसम्म सम्पत्ति विवरण बुझाउन अन्तिम समयसीमा तोकिएको थियो । भ्रष्टाचार निवारण ऐन–२०५९ को दफा ५० मा प्रत्येक वर्ष सार्वजनिक पद धारण गरेको व्यक्तिले आव शुरु भएको ६० दिनभित्र सम्पत्ति विवरण सम्बन्धित कार्यालयमा बुझाउनुपर्ने व्यवस्था रहेको छ ।
किताबखानाले सङ्कलन गरिएको सम्पत्ति विवरण राष्ट्रिय सतर्कता केन्दं्रलाई बुझाएको छ । ऐनअनुसार सम्पत्ति विवरण नबुझाउनेलाई केन्द्रको सिफारिशमा अख्तियार दुरुपयोग अनुसन्धान आयोगले रु पाँच हजार जरिवाना गर्ने व्यवस्था रहेको छ ।
